بدك تتقاعدي بكير؟ لازم تقرأي هاي المقالة

تعي نحكي عن التقاعد

بدك بشي مرحلة تتقاعدي، صح؟ معناه لازم تستثمري.

لما اتقاعد، بديش اقعد بالبيت. حلمي هو انو اكون فعّالة. انو يكون معي كفاي مصاري ووقت انو أسعى ورا أحلامي، أنمّي مواهبي، أو أتمرّن على هواياتي. يكون معي كفاي وقت اتطوع وين بحب، يكون معي كفاي مصاري ادعم نساء اللي عندهن مصالح، واقدر اتبرّع للاشيا اللي بآمن فيها بدون ما احس بضغط مادي.

فكرتك أنت عن التقاعد يمكن مختلفة - يمكن بتحبي شط ب"هاواي" مع كتاب عيمينك وكوكتيل حلو ع شمالك، او يمكن بدك تعيشي بايطاليا بنص الحقول الخضرا، او حتى يمكن حلمك تسكني ببيت دافي وحلو ومزّين عزوقك وعيلتك حواليكي مبسوطة.

مش مهم شو حلمك- اذا بتعملي للحلم خطة، فراح يصير حقيقة!

هاد هو الجزء الصعب، انك تفكري ٢٠\٣٠ سنة لقدام وتعملي الاشيا اليوم اللي راح توصّلك لهناك. بس صدقيني، لازم تعملي هيك. لأنو بتستحقي تحلمي وبتستحقي توصلي احلامك.

بتستحقي مستقبل مع شعور بالحرية والأمان والسعادة. الاشي بس بدو شوية تخطيط.

في كل محل شغل، حسب القانون بالدولة لازم يفتحولك حساب توفير (او بشكل دقيق أكتر: استثمار) للتقاعد. هون ننجاوب على سؤال:

شو الامكانيات اللي عندك لحساب تقاعد؟

١) קרן פנסיה (صندوق تقاعد):

هاي هي الامكانية اللي عالاغلب بتعرفيها\سامعة عنها. جزء من معاشك كل شهر بنحط بهاد الحساب + محل الشغل بحطلّك مصاري إضافيّة مجّانية فيو شهريًّا.

هون بطلعلك الإمكانيّة تختاري بأي مسار تحطي مصاريكي للتقاعد (جدا مهم اي مسار بتختاري! أغلب الناس ما بتختار وبتترك القرار للدولة تختار عنها وبتخسر مئات آلاف الشواقل). هاد الحساب كمان يشمل تأمينات مهمة لحالات صعبة (موت\اعاقة، بعيدًا عنك).

مقابل هاد الصندوق وهاي الخدمة، بتدفعي نسبة مئوية صغيرة من مصاريكي اللي بالصندوق.

٢) קופת גמל:

هاد اسم اللي بشمل تحته عدة ادوات للتوفير للتقاعد مثل: קופת גמל לתגמולים, קרן השתלמות, وغيرها.

بطلعلك تختاري انو توفيرك يكون بקופת גמל לתגמולים وساعتها محل الشغل بحطلّك المصاري فيها بدل صندوق التقاعد العادي (פנסיה). او بنفع كمان انت تختاري تحطي فيها مصاري بدون علاقة لمحل شغلك.

الدولة بتشجعك تستعملي קופת גמל عن طريق انو تعطيكي تنزيلات عالضرايب هناك!

بس شو؟🙄 بקופת גמל في "مدراء" للصندوق وهني مسؤولين عن استثمار مصاري الصندوق، فبالعادة بدك تدفعي اكتر من امكانيات تانية.

(في طريقة انك تتجنبي هاد الدفع الغالي بالקופת גמל بس هاي للمتقدمين، منحكي عنها بعدين.)

اسا اذا بدنا نحكي عن קרן השתלמות، فهي اشي واو واو❤️‍🔥 مجبورة حسب رايي تفتحي وحدة اذا بتقدري\اذا محل الشغل بعرض عليكِ\أو اذا انت بتشتغلي مستقلّة (يعني عندك مصلحة). كتيييير تنزيلات بالضرايب (صفر ضرايب!)وكتير امكانية ممتازة للتوفير للتقاعد او حتى بنفع تضل وتورّثيها لأولادك بدون ما تدفعي عليها ضرايب (بأغلب الحسابات الأخرى في ضرايب عالتوريث)!

٣) ביטוח מנהלים:

هو اخر امكانية لاستثمار مصاري للتقاعد. هاي الامكانية زي اللي قبلها بتدفعلك مصاري شهرية لما تتقاعدي. لكن هي بالواقع عقد ممضي بينك وبين شركة تأمين اللي فيها الشركة بتوعدك تدفعلك (لعيلتك) بحالة وفاتك او مرات بحالة اعاقة بعيدًا عنك.

قبل ال٢٠١٣، كان هاد التوفير مغري، لانو كان في قوانين اللي بسببها المعاش الشهري بعد التقاعد بكون اكبر من امكانيات تانية، حتى لو وفّرتي نفس المبلغ بكل المحلات! لكن بطّلت هاي القوانين... فصار هاد التوفير غالي تقريبًا عالفاضي😅.

👈اذا حابة تعرفي اكتر عن استثمارات التقاعد، شو الك وشو عليكي، عن كل امكانية، كيف تختاري منهن، اي شركة، اي مسار، أي مصاري...
👈👈 انضمي لورشة التقاعد القادمة!
هناك راح نغطي كلللشي مهم لازم تعرفيه عالموضوع بلغة بسيطة، وبالعربي، وراح تطلعي منها حاسة كتير اكتر ثقة بمستقبلك🩷

ملاحظة: الورشة مسجّلة، وراح تقدري تحضري التسجيل لمدّة أيّام بعد اللقاء بحالة وقت الورشة غير مناسب الك (التّسجيل بنمحى بعد أسبوع).