كيف رفعت معاشي الشهري ب٢٣٠٠ شيكل بمحادثة قصيرة

حزيران ٢٠٢٤، بلشت شغل جديد، بشركة جديدة، بدولة جديدة، بوظيفة جديدة

حزيران ٢٠٢٥، حصلت على ارتفاع ٢٣٠٠ شيكل عمعاشي الشهري (بعد ب١٢ شهر شغل فقط!😍) 

راح أشارككو كيف فاوضت عمعاشي وكيف حصلت عشو بدي

يمكن تتوقعو أحكيلكو عن الجملة السحرية اللي حكيتلها لمديري عشان يرفعلي معاشي، أو احكيلكو شو السرّ اللي بخلّيني أقبض أكتر من غيري

بس للأسف (أو لحسن الحظ؟) فش اشي سرّي أو سحري. الطريقة جدًّا واقعية، وكل وحدة فيكو بتشتغل بشركة بتقدر تطبّقها.

أوّل اشي سويتو

هو انو قعدت مع مديري بال٢٠٢٤. قلتلو:

"اسمع، انا بعرف انو محادثة الأداء بتصير مرة بالسنة. بعرف انو مرة بالسنة راح تقرر انت اذا ترفعلي معاشي ولّا لا،
فشو الصفات أو النتائج اللي لازم تشوفها منّي خلال هاي السنة، عشان بال٢٠٢٥ تعتبر آداءي عمستوى عالي وترفعلي معاشي كذا نسبة مئوية؟"

.هاد هو. هاد السؤال بمهّد الطريق لكللللل اشي بالسنة القريبة.

تانيا،

بعد ما حكالي "واحد تنين تلاتة، هاد اللي بتوقّع أشوفه منّك"

طلعت من الاجتماع وبعثتله ايميل فيه توثيق لشو حكينا. متلا:

"شكرا على اللقاء اللي عملناه، انا اسا عندي وضوح كتير أكبر بالنسبة لشو متوقّع مني خلال السنة.
عشان اتأكد اني متذكرة صح شو حكينا: اتفقنا انو اذا انا بعمل واحد تنين تلاتة، فآدائي راح يُعتبر ممتاز ومعاشي راح يرتفع بما يناسب الآداء بكذا نسبة مئوية."

بهاي الطريقة صار عندك إثبات وتوثيق لمحادثتكو.

ثالثا،

بدناش انت تنسي شو اتفقتو، والأهم بدناش المدير ينسى شو اتفقتو.

فبنفع تختاري متلا مرّة بالاسبوعين او مرة بالشهر، وتحتلني مديرك بتقدًّمك. 

ممكن عن طريق ايميل اللي فيو تحكيلو عن تقدُّمك والمهام اللي عملتيها آخر فترة، 

او ممكن باجتماع قصير تقعدو وتحتلنيه بالجهود والنتائج اللي عم تعمليها. اذا بتحكيلوش، مش راح يعرف لحالو.

أنا التقيت فيه أسبوعيًا.

رابعا وأخيرًا،

لما ييجي يوم مراجعة الآداء تاع العمال وتقرير المصير بالنسبة للمعاش - اولريدي عملتي الشغل الصعب! 

مديرك اولريدي بعرف شو حققتي كل هاي الفترة. مش راح يتفاجأ من اشي.

بتوصلو محادثة الآداء وانتو التنين عنفس الصفحة!

تخيّلي قدي أهون للمدير يرفعلك معاشك بعد كل هاي المحادثات اللي بينكو.

شو النتيجة النهائية؟ محادثة آداء قصيرة، وارتفاع بتستحقيه عالمعاش💪🏾

قدّي الاشي مبيّن واضح ومفهوم ومش صعب،
بس أنا متأكدة انو أغلبكو بتعملوش هيك، لأنو انا كمان مكنتش اعمل هيك!!
كنت أستنّى محادثة الأداء مرّة بالسنة وما أقدرش أتوقّع شو راح يحكيلي. مرّات يفاجئني للأحسن ومرّات للأسوأ. بس اسا تعلّمت انو بدناش مفاجآت، بدنا نلائم التوقعات.

بس كيف اصلا كان لازم اكتشف هاي الطريقة؟ محدا حكالي.
كنت أصلا أستحي احكي مع مديري مرات😅 ولاو الطريق اللي مرقتها ووين وصلت. فخورة بنفسي🩷

المهم، من كل قلبي بتمنى لكل وحدة فيكو تمرق هيك طريق وتتقدم حتى أكتر مني وتيجي تحكيلي عن كل ترقياتها وارتفاعات معاشها.